"យុវជនខ្មែរដេញតាមខ្យល់" ជិះម៉ូតូឆ្លងកាត់ ២២ ប្រទេស
ថ្ងៃទី៩ ខែវិច្ឆិកា ឆ្នាំ២០២៤ គឺជាថ្ងៃបុណ្យឯករាជ្យជាតិលើកទី ៧១ របស់ប្រទេសកម្ពុជា ហើយក៏ជាថ្ងៃទី ១២៧ នៃការជិះម៉ូតូរបស់អ្នកចូលចិត្តជិះម៉ូតូកម្ពុជា អ៊ុំ ប៊ុនរ៉េត បន្ទាប់ពីធ្វើដំណើរឆ្លងកាត់ ២២ ប្រទេសរួចមក គាត់បានត្រឡប់មកទីក្រុងភ្នំពេញវិញ ហើយសម្រេចក្តីសុបិន និងបំណងប្រាថ្នាជិះម៉ូតូជាច្រើនឆ្នាំ។
ឆ្នាំនេះ លោក អ៊ុំ ប៊ុនរ៉េ អាយុ ៤៤ ឆ្នាំហើយ តាំងពីគាត់ទិញ "ម៉ូតូក្នុងក្តីស្រមៃ" របស់ខ្លួននៅអាយុ ១៨ ឆ្នាំ គាត់មិនដែលឈប់ធ្វើដំណើរដោយជិះចម្ងាយខ្លី ឬផ្លូវឆ្ងាយទេ លោកបានប្រាប់អ្នកកាសែតថា "ខ្ញុំរៀនជិះម៉ូតូពេលម្រាមជើងប៉ះដី។ នៅក្នុងប្រទេសកម្ពុជា នេះហាក់ដូចជាជំនាញដែលត្រូវការសម្រាប់យុវជនគ្រប់រូប។ សម្រាប់យុវជនខ្មែរ ម៉ូតូមិនត្រឹមតែជាឧបករណ៍ងាយស្រួលសម្រាប់ការធ្វើដំណើរប៉ុណ្ណោះទេ ប៉ុន្តែថែមទាំងបង្កប់នូវភាពងប់ងល់និងយុវវ័យរបស់ពួកគេផងដែរ"។
លើកនេះ លោក អ៊ុំ ប៊ុនរ៉េត បានជ្រើសរើសទីក្រុង Munich ប្រទេសអាល្លឺម៉ង់ ដែលជាកន្លែងដែលក្រុមហ៊ុនមេរបស់យីហោ BMW គឺក្រុមហ៊ុនBayerische Motorenwerke GmbHជាចំណុចចាប់ផ្តើមនៃការធ្វើដំណើរនេះ ហើយឆ្លងកាត់ប្រទេសបារាំង ស៊ុយអែត តួកគី ប៉ាគីស្ថាន... និងបានមកដល់តំបន់ស្វយ័តស៊ីនជាំងនៃប្រទេសចិន តាមរយៈផ្លូវហាយវ៉េ Karakoram មិត្តភាពចិន-ប៉ាគីស្ថាន ដោយបានធ្វើដំណើរទៅភាគខាងត្បូង និងឆ្លងកាត់តំបន់ស្វយ័តXizangហើយបានមកដល់ទីក្រុងគុនមីងដែលជាទីក្រុងនិទាឃរដូវដែលផ្ការីកពេញមួយឆ្នាំ នៅថ្ងៃទី ២៨ ខែតុលា។
លោក អ៊ុំ ប៊ុនរ៉េត បាននិយាយថា "ខេត្តយូណានមានអាកាសធាតុល្អប្រសើរ ទេសភាពដ៏ស្រស់ស្អាត និងអាហារឈ្ងុយឆ្ងាញ់ជាច្រើន។ ខ្ញុំពិតជានឹងនាំក្រុមគ្រួសារ និងមិត្តភក្តិរបស់ខ្ញុំមកធ្វើដំណើរម្តងទៀតនាពេលអនាគត"។
លោកបានបន្ថែមថា "ខ្ញុំបើកបរយ៉ាងឆាប់រហ័សតាមបណ្តោយផ្លូវថ្នល់ក្នុងតំបន់ស៊ីនជាំងដោយសប្បាយរីករាយ។ ខ្ញុំបានកើតជំងឺប្រតិកម្មខុសប្រក្រតីពេលនៅរយៈកម្ពស់ខ្ពស់នៅតំបន់Xizangហើយត្រូវបឺតអុកស៊ីហ្សែនពេញមួយយប់ ជំនួយដ៏សាទររបស់ប្រជាជនក្នុងតំបន់បានអនុញ្ញាតឱ្យខ្ញុំឆ្លងកាត់តំបន់ខ្ពស់និងរងារខ្លាំងក្លាដោយជោគជ័យ។ បន្ទាប់ពីបានទៅដល់ទីក្រុងលីជាំងនិងមណ្ឌលតាលី នៃខេត្តយូណាន អាកាសធាតុដ៏សុខស្រួល និងអាហារឆ្ងាញ់ពិសេសជាច្រើនបានធ្វើឱ្យខ្ញុំសម្រេចចិត្តស្នាក់នៅពីរថ្ងៃទៀត"។ ជាការពិត លោក អ៊ុំ ប៊ុនរ៉េតបានទៅទស្សនានៅប្រទេសចិនជាច្រើនដងហើយ លោកថែមទាំងមានឈ្មោះជាភាសាចិនថា លី វិនលឺប៉ុន្តែខេត្តដែលលោកបានទៅដល់លើកនេះគឺជាលើកដំបូង ហើយជិះម៉ូតូពីតំបន់ស៊ីនជាំងទៅខេត្តយូណាន លោកបានចំណាយពេល ២៥ ថ្ងៃ។
ពេលនិយាយពីបំណងដើមនៃការជិះម៉ូតូឆ្លងប្រទេសជាច្រើន កែវភ្នែករបស់លោក អ៊ុំ ប៊ុនរ៉េត បានបញ្ចេញពន្លឺខុសប្លែកពីធម្មតា លោកបានប្រាប់អ្នកកាសែតដោយរឹងមាំថា "ដើម្បីណែនាំ និងផ្សព្វផ្សាយប្រវត្តិសាស្ត្រ វប្បធម៌ និងទេសចរណ៍របស់ប្រទេសកម្ពុជា។រាល់ពេលដែលខ្ញុំទៅប្រទេស ឬទីក្រុងណាមួយ ខ្ញុំនឹងជូនស្ទីគ័រផ្សព្វផ្សាយផលិតដោយខ្លួនដល់មិត្តក្នុងតំបន់ដែលមាននិស្ស័យ ដើម្បីឱ្យប្រជាជនមកពីប្រទេសកាន់តែច្រើនស្គាល់ និងស្វែងយល់ពីប្រទេសកម្ពុជា ហើយសូមស្វាគមន៍ពួកគេមកទស្សនា និងទទួលយកបទពិសោធន៍ប្រទេសកម្ពុជា ដែលជាប្រទេសដ៏អាថ៌កំបាំង និងមានមន្តស្នេហ៍"។
លោកបានបន្ថែមទៀតថា "ខ្ញុំសង្ឃឹមថានឹងពង្រឹងទំនាក់ទំនងជាមួយក្លឹបម៉ូតូចិន និងអ្នកចូលចិត្តជិះម៉ូតូចិន រួមទាំងខេត្តយូណាន ហើយរួមគ្នារៀបចំផែនការផ្លូវជិះម៉ូតូទេសចរណ៍កម្ពុជា-ចិននាពេលអនាគត ខ្ញុំក៏សង្ឃឹមថាមានអ្នកចូលចិត្តជិះម៉ូតូកាន់តែច្រើនមកពីប្រទេសមេគង្គ-ឡានឆាងមកចូលរួមក្នុងក្រុមយើង ដើម្បីពង្រីកខ្សែផ្លូវជិះម៉ូតូជាមួយគ្នា ហើយឱ្យអ្នកចូលចិត្តជិះម៉ូតូកាន់តែច្រើនអាចជ្រមុជខ្លួនក្នុងចំណាប់អារម្មណ៍ដ៏សប្បាយនៃការជិះម៉ូតូ"។ លោក អ៊ុំ ប៊ុនរ៉េតពោរពេញទៅដោយការរំពឹងទុកសម្រាប់កិច្ចសហប្រតិបត្តិការជាមួយក្លិបមកពីប្រទេសជិតខាង។
លោកបានបញ្ជាក់ថា "លើសពីនេះ ថវិកាទាំងអស់ដែលបានរៃអង្គាសដោយសមាជិកនៃក្លឹបម៉ូតូកម្ពុជាក្នុងនាមដំណើរការជិះម៉ូតូនេះ នឹងបរិច្ចាគដល់មន្ទីរពេទ្យគន្ធបុប្ផាកម្ពុជា នេះជាមន្ទីរពេទ្យដែលផ្តល់ការព្យាបាលដោយឥតគិតថ្លៃដល់កុមារទាំងអស់ រួមទាំងជនបរទេសផងដែរ"។ សម្រាប់លោក អ៊ុំ ប៊ុនរ៉េត ដំណើរនេះគឺជាដំណើរដែលពោរពេញទៅដោយក្ដីស្រឡាញ់ និងការលំបាកខ្លាំងណាស់ ហើយក៏មានសារៈសំខាន់ខ្លាំងណាស់ផងដែរ៕
អ្នកយកព័ត៌មាន៖ Shen Yan
អ្នកបកប្រែ៖ Shen Yan
