កញ្ញា ជា ហ៊ុយគៀង ៖ អាហារដ៏មានឱជារសនៅខេត្តយូណាន
កញ្ញា ជា ហ៊ុយគៀង ជានិស្សិតអន្តរជាតិមកពីប្រទេសកម្ពុជា ដែលជាអ្នកចូលចិត្តអាហារឆ្ងាញ់ៗម្នាក់។ សម្រាប់នាង ប្រទេសចិនគឺជាប្រទេសអស្ចារ្យមួយដែលពោរពេញទៅដោយម្ហូបអាហារដ៏ឈ្ងុយឆ្ងាញ់ ហើយខេត្តយូណានគឺជាគុជដ៏ភ្លឺចាំងចែងមួយនៅក្នុងទឹកដីអស្ចារ្យនេះ ។
"ខ្ញុំបានភ្លក់អាហារសម្រន់ពិសេសឆ្ងាញ់ៗគ្រប់ប្រភេទនៅខេត្តក្វាងតុង ហ៊ូណាន ស៊ីឈ័ង និងយូណាន ។ ការកែច្នៃមុខម្ហូបពីការចម្អិនផ្សេងៗគ្នាក៏មានរសជាតិឆ្ងាញ់ផងដែរ!" កញ្ញា ជា ហ៊ុយគៀង បច្ចុប្បន្នកំពុងសិក្សានៅសាកលវិទ្យាល័យតាលី ជាធម្មតា នាងចូលចិត្តភ្លក់រសជាតិអាហារឆ្ងាញ់ៗគ្រប់ប្រភេទ ព្រមទាំងបង្ហាញអារម្មណ៍នៃការវាយតម្លៃរបស់នាងនៅលើវេទិកាសង្គម។ ពេលនាងដើរលើទឹកដីខេត្តយូណាន ទើបទទួលបានអារម្មណ៍យ៉ាងពិតប្រាកដនៃភាពទាក់ទាញដ៏ពិសេសនៃអាហារឆ្ងាញ់ ។
"ក្នុងពិព័រណ៍ចិន-អាស៊ីខាងត្បូង មានអាហារឆ្ងាញ់ៗរបស់ខេត្តយូណានជាច្រើន ហើយខ្ញុំចង់ភ្លក់រសជាតិអាហារទាំងអស់"។ កញ្ញា ជា ហ៊ុយគៀង បានដើរមើលពន្លាជាច្រើនកន្លែង ហើយពន្លាដែលធ្វើឱ្យនាងចាប់អារម្មណ៍បំផុតគឺ "អាហារឆ្ងាញ់ក្នុងពិព័រណ៍ចិន-អាស៊ីខាងត្បូង" ។ ពន្លា "អាហារឆ្ងាញ់ក្នុងពិព័រណ៍ចិន-អាស៊ីខាងត្បូង" លើកនេះ រួមមានក្រុមហ៊ុនម្ហូបអាហារចំនួន ៤៧ ដែលមកពីទីក្រុងចំនួន ១៣ បានបង្កើតតូបអាហារក្នុងពន្លា ដោយនាំយកនូវ តែ ភេសជ្ជៈ អាហារសម្រន់ ម្ហូបអាហារជនជាតិពិសេស ជូនទស្សនិកជន ។
រយៈពេល ៦ ឆ្នាំក្នុងខេត្តយូណាន កញ្ញា ជា ហ៊ុយគៀង ហាក់ដូចជារស់នៅក្នុងឋានសួគ៌អាហារ ។ កញ្ញា ជា ហ៊ុយគៀង និយាយថា៖ "កុំសួរខ្ញុំថា គុយទាវប្រភេទណាឆ្ងាញ់ជាងគេ ខ្ញុំចូលចិត្តទាំងអស់! ខ្ញុំមានអារម្មណ៍ថា គុយទាវមានតំណែងខ្ពស់ណាស់នៅក្នុងខេត្តយូណាន។ នេះធ្វើឱ្យខ្ញុំនឹកឃើញពីគុយទាវប្រទេសកម្ពុជា ។ អ្នកអាចញ៉ាំគុយទាវសម្រាប់អាហារពេលព្រឹក អាហារថ្ងៃត្រង់ ឬអាហារពេលល្ងាច គ្រាន់តែញ៉ាំមួយចាននៅពេលព្រឹក គឺកាន់តែឆ្ងាញ់។" ការរីកចម្រើននៃវិស័យដឹកជញ្ជូនអាហារខ្ចប់របស់ប្រទេសចិនបាននាំមកនូវភាពងាយស្រួលជាច្រើនដល់អ្នកចូលចិត្តអាហារដូចជានាង នៅសាលារៀន អ្នកអាចញ៉ាំអាហារឆ្ងាញ់ៗគ្រប់ប្រភេទបានយ៉ាងងាយស្រួល រហ័ស និងតម្លៃសមរម្យ។
សម្រាប់កញ្ញា ជា ហ៊ុយគៀង ការភ្លក់អាហារឆ្ងាញ់ៗគ្រប់ប្រភេទគឺជារបៀបរស់នៅមួយប្រភេទ។ ភាពសម្បូរបែបនៃអាហាររបស់ខេត្តយូណាន បានមកពីផលិតផលសម្បូរបែបពិសេសនិងវប្បធម៌ជនជាតិភាគតិចចម្រុះ នៅតាមតូបលក់អាហារតាមដងផ្លូវ នាងបានទទួលអារម្មណ៍យ៉ាងជ្រាលជ្រៅនូវជីវិតដ៏ស្រស់ស្អាតក្នុងខេត្តយូណាន៕
អ្នកយកព័ត៌មាន Wang Yunya
អ្នកបកប្រែ៖ លីហ្សា