អវកាសយានិកទាំងបីរូបនៃយានអវកាសដឹកមនុស្ស Shenzhouu-18 បានចូលប្រចាំការនៅស្ថានីយអវកាសចិនដោយរលូន

តាមដំណឹងនៃការិយាល័យវិស្វកម្មយានអវកាសដឹកមនុស្សចិនឱ្យដឹងថា នៅវេលាម៉ោង ៣ និង ៣២ នាទីថ្ងៃទី ២៦ ខែមេសាឆ្នាំ ២០២៤ តាមម៉ោងក្រុងប៉េកាំង យានអវកាសដឹកមនុស្ស Shenzhou-18 បានតភ្ជាប់ជាមួយកាប៊ីនស្នូល Tianhe នៃស្ថានីយអវកាសចិនដោយជោគជ័យ។ នៅវេលាម៉ោង ៥ និង ៤នាទីថ្ងៃទី ២៦ ខែមេសាឆ្នាំ ២០២៤ តាមម៉ោងក្រុងប៉េកាំង ក្រុមអវកាសយានិកនៃយានអវកាស Shenzhou-17 ដែលកំពុងបំពេញការងារនៅគន្លងតារាវិថីបានបើកទ្វាតភ្ជាប់គ្នាដោយរលូនដើម្បីអបអរស្វាគមន៍ក្រុមអវកាសយានិកទាំងបីរូបនៃយានអវកាសដឹកមនុស្ស Shenzhou-18 ចូលប្រចាំការ។បន្ទាប់មក ក្រុមអវកាសយានិកទាំងពីរបានថតរូបអនុស្សាវរីយ៍ជាមួយគ្នា។ អវកាសយានិកទាំង ៦ រូបនឹងធ្វើការនិងរស់នៅជាមួយគ្នានៅស្ថានីយអវកាសរយៈពេលប្រហែល ៥ ថ្ងៃ ដើម្បីសម្រេចការងារដែលបានកំណត់ទុក។

សូមបញ្ជាក់ថា នេះជាបេសកកម្មបាញ់បង្ហោះលើកទី ៣២ ចាប់តាំងពីប្រទេសចិនអនុវត្តវិស្វកម្មយានអវកាសដឹកមនុស្សមក៕