ការិយាល័យនយោបាយនៃគណៈកម្មាធិការមជ្ឈិមបក្សកុម្មុយនីស្តចិនបើកធ្វើកិច្ចប្រជុំទិតៀននិងស្វ័យទិតៀន លោក Xi Jinping ប្រធានរដ្ឋចិនធ្វើជាអធិបតីនិងថ្លែងសុន្ទរកថា សំខាន់ក្នុងកិច្ចប្រជុំ
ការិយាល័យនយោបាយនៃគណៈកម្មាធិការមជ្ឈិមបក្សកុម្មុយនីស្តចិនបានបើកធ្វើកិច្ចប្រជុំទិតៀននិងស្វ័យទិតៀននៅថ្ងៃទី ២៦ និងថ្ងៃទី ២៧ ខែធ្នូ ដើម្បីសិក្សានិងអនុវត្តយ៉ាងស៊ីជម្រៅនូវគំនិតសង្គមនិយមដែលមានលក្ខណៈពិសេសចិនក្នុងយុគសម័យថ្មី ជុំវិញការពង្រឹងនិងពង្រីកសមិទ្ធផលនៃការសិក្សានិងអប់រំអំពីវិន័យបក្ស ចាត់ទុកការសិក្សានិងអនុវត្តលក្ខន្តិកៈស្តីពីការដាក់ពិន័យលើបទល្មើសវិន័យបក្ស និងការកំណត់ ៨ ខនៃមជ្ឈិមបក្សកុម្មុយនីស្តចិនជាខ្លឹមសារដ៏សំខាន់នៃការត្រួតពិនិត្យ ហើយគូបផ្សំជាមួយនឹងគំនិតនិងការងារជាក់ស្តែងផ្ទាល់ខ្លួនដើម្បីធ្វើការពិនិត្យនិងវិភាគខ្លួនឯង ធ្វើការទិតៀននិងស្វ័យទិតៀន ។
លោក Xi Jinping ប្រធានរដ្ឋចិនបានធ្វើជាអធិបតីនិងថ្លែងសុន្ទរកថាសំខាន់ក្នុងកិច្ចប្រជុំ ។
សមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនីស្តចិនបានថ្លែងសុន្ទរកថា ដោយផ្តោតសំខាន់ទៅលើ ៥ ចំណុច។ ទី១ បង្កើនការប្តេជ្ញាចិត្តបន្ថែមទៀតក្នុងការគាំពារសត្យានុភាព និងការដឹកនាំជាសហមូហភាពនៃមជ្ឈិមបក្សកុម្មុយនីស្តចិន ។ ទី២បង្កើនការប្តេជ្ញាចិត្តបន្ថែមទៀតក្នុងការកសាងគុណតម្លៃនៃការបម្រើប្រជាជននិងផ្តល់ផលប្រយោជន៍ដល់ប្រជាជន ។ ទី៣ បង្កើនការប្តេជ្ញាចិត្តបន្ថែមទៀតក្នុងការអនុវត្តសេចក្តីសម្រេចចិត្តនិងការចាត់ចែងរបស់មជ្ឈិមបក្សកុម្មុយនីស្តចិន។ ទី៤ បង្កើនការប្តេជ្ញាចិត្តបន្ថែមទៀតក្នុងការដឹកនាំការសិក្សាវិន័យ យល់ដឹងពីវិន័យ និងប្រតិបត្តិតាមវិន័យ។
ទី៥ បង្កើនការប្តេជ្ញាចិត្តបន្ថែមទៀតក្នុងការអនុវត្តទំនួលខុសត្រូវផ្នែកនយោបាយ និងគ្រប់គ្រងបក្សយ៉ាងតឹងរ៉ឹង។
សមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនីស្តចិនបានឯកភាពគ្នាថា ឆ្នាំក្រោយគឺជាឆ្នាំបញ្ចប់ផែនការ៥ឆ្នាំទី១៤ ត្រូវពន្លឿនការកសាងនិម្មាបនកម្មអភិវឌ្ឍន៍ថ្មី លើកកម្ពស់កម្រិតជីវភាពរស់នៅរបស់ប្រជាជនជាបន្តបន្ទាប់ រក្សាភាពសុខដុមរមនានិងស្ថិរភាពសង្គម ប្រកាន់ខ្ជាប់នូវការគ្រប់គ្រងបក្សដោយគ្រប់ជ្រុងជ្រោយយ៉ាងតឹងរ៉ឹង ដើម្បីកសាងមូលដ្ឋានដ៏រឹងមាំសម្រាប់ការចាប់ដំណើការនៃ"ផែនការប្រាំឆ្នាំទី១៥៕