ການປ່ຽນແປງລະບົບຕ່ອງໂສ້ການສະໜອງ ແລະ ການພັດທະນາການຜະລິດພາຍ ໃນປະເທດທີ່ຢູ່ເບື້ອງຫຼັງ “ໝາກຖົ່ວລຽນເສລີ” ຂອງຈີນ

ໃນວັນທີ 10 ພຶດສະພາ 2026, ທີ່ຕະຫລາດຂາຍຍົກໝາກໄມ້ ຈີນໝ່າເຈີ້ງຊາງ ນະຄອນຄຸນໝິງ, ລາຄາໝາກຖົ່ວລຽນທີ່ເຄີຍຖືກເອີ້ນວ່າ “ໝາກໄມ້ຊັ້ນສູງ” ໄດ້ກາຍເປັນລາຄາທີ່ເຂົ້າເຖິງໄດ້ຫລາຍຂຶ້ນ. ລາຄາໝາກຖົ່ວລຽນໝອນທອງ ໄດ້ຫລຸດລົງເຖິງ 28ຢວນຕໍ່ກິໂລຂຶ້ນໄປ, ໃນຂະນະທີ່ແພລັດຟອມອີຄອມເມີຊ ຍັງມີໂປຣໂມຊັນຊື້ໝາກຖົ່ວລຽນ 2 ກິໂລຂຶ້ນໄປ ໃນລາຄາ 129 ຢວນທີ່ລວມທັງຄ່າສົ່ງ. ໝາກໄມ້ເຂດຮ້ອນຊະນິດນີ້ ທີ່ໄດ້ຮັບຄວາມນິຍົມໃນປະເທດຈີນ ພວມຢູ່ໃນໄລຍະການປ່ຽນແປງລະບົບຕ່ອງໂສ້ການສະໜອງຢ່າງເລິກເຊິ່ງ. 

ລາຄາໝາກຖົ່ວລຽນທີ່ເປັນກັນເອງ, ກ່ອນອື່ນໝົດແມ່ນໄດ້ຮັບຜົນປະໂຫຍດຈາກການປັບປຸງຢ່າງວ່ອງໄວຂອງການຂົນສົ່ງຂ້າມຊາຍແດນ. ໃນກາງເດືອນເມສາ, ປະເທດໄທ ແລະ ມາເລເຊຍ ໄດ້ເຂົ້າສູ່ໄລຍະເວລາທີ່ໝາກຖົ່ວລຽນອອກສູ່ຕະຫຼາດຢ່າງຫຼວງຫຼາຍ. ຜ່ານ “ຂະບວນລົດໄຟຂົນສົ່ງສາຍເຢັນ” ຂອງທາງລົດໄຟລາວ-ຈີນ (ຄຸນໝິງ-ວຽງຈັນ), ໝາກຖົ່ວລຽນຈາກປະເທດໄທໃຊ້ເວລາພຽງ 26 ຊົ່ວໂມງກໍໄປຮອດຄຸນໝິງ. ຫຼັງຈາກນັ້ນ, ໝາກໄມ້ເຫຼົ່ານີ້ໄດ້ຖືກແຈກຢາຍໄປຫຼາຍກວ່າ30 ເມືອງທົ່ວປະເທດຈີນເຊັ່ນ: ກວາງໂຈ່ວ, ຊຽງໄຮ, ເສິ່ນຢາງ ພາຍໃນ 48 ຊົ່ວໂມງ. ນອກຈາກທາງລົດໄຟແລ້ວ, ການຂົນສົ່ງທາງນໍ້າ ແລະ ທາງບົກກໍໄດ້ເລັ່ງພ້ອມກັນ. ດ່ານບໍ່ຫານ ໃນຢຸນນານ ໄດ້ປັບປຸງຂະບວນການຜ່ານດ່ານໃຫ້ດີຂຶ້ນ,

ເຮັດໃຫ້ສາມາດ “ຂົນຖ່າຍທັນທີທີ່ລົດມາເຖິງ” ແລະ “ກວດກາ ແລະ ປ່ອຍທັນທີ”. ດ້ວຍປະສິດທິພາບການຂົນສົ່ງທີ່ເພີ່ມຂຶ້ນ ແລະ ການສູນເສຍທີ່ຫຼຸດລົງ, ໝາກຖົ່ວລຽນບໍ່ຈຳເປັນຕ້ອງໃຊ້ສານເລັ່ງການສຸກອີກຕໍ່ໄປ, ເຊິ່ງເຮັດໃຫ້ມີຄວາມສຸກແບບທຳມະຊາດທີ່ດີຂຶ້ນ ແລະ ມີລົດຊາດດີຂຶ້ນ, ພ້ອມທັງຫຼຸດຜ່ອນຕົ້ນທຶນການຂົນສົ່ງໂດຍກົງ.

 ຈີນເປັນຕະຫຼາດບໍລິໂພກໝາກຖົ່ວລຽນທີ່ໃຫຍ່ທີ່ສຸດໃນໂລກ. ນັບມາຮອດປີ 2025, ຈີນກວມອັດຕາສ່ວນຫຼາຍກວ່າ 90% ຂອງສ່ວນແບ່ງຕະຫຼາດບໍລິໂພກໝາກຖົ່ວລຽນທົ່ວໂລກ. ສະເພາະສອງເດືອນຕົ້ນປີນີ້, ມູນຄ່າການນຳເຂົ້າໝາກຖົ່ວລຽນຢູ່ດ່ານຊາຍແດນຕ່າງໆຂອງແຂວງຢຸນນານມີເຖິງ 2 ຕື້ 50 ລ້ານຢວນ, ເພີ່ມຂຶ້ນ 351,6% ເມື່ອທຽບໃສ່ໄລຍະດຽວກັນຂອງປີກາຍ. ຄວາມຮຽກຮ້ອງຕ້ອງການດ້ານຄຸນນະພາບສູງຂອງຜູ້ບໍລິໂພກຈີນ, ກຳລັງບັງຄັບໃຫ້ການຍົກລະດັບອຸດສາຫະກຳໝາກຖົ່ວລຽນຢູ່ອາຊີຕາເວັນອອກສ່ຽງໃຕ້. ປະເທດໄທໄດ້ອອກກົດໝາຍຫ້າມການກະທຳຕ່າງໆເຊັ່ນ: “ໝາກທີ່ຍັງບໍ່ສຸກ, ມີສັດຕູພືດ, ປອມແປງຄຸນວຸດທິ, ຕື່ມສີຍ້ອມ” ແລະ ວິສາຫະກິດບາງແຫ່ງໄດ້ເລີ່ມສົ່ງເສີມແນວຄິດ “ໝາກສຸກເທິງຕົ້ນ” ພ້ອມທັງນຳໃຊ້ລະບົບການຄັດແຍກດ້ວຍ AI ແລະ ລະບົບຕິດຕາມກວດກາຕະຫຼອດຂະບວນການ.

ເຖິງແມ່ນວ່າໝາກຖົ່ວລຽນທີ່ນຳເຂົ້າຈະເປັນທີ່ນິຍົມ, ແຕ່ການປູກໝາກຖົ່ວລຽນພາຍໃນປະເທດຈີນກໍກຳລັງບັນລຸຜົນສຳເລັດທີ່ໂດດເດັ່ນ, ເຮັດໃຫ້ "ໝາກຖົ່ວລຽນພາຍໃນປະເທດ" ກາຍເປັນສິ່ງທີ່ເປັນໄປໄດ້. ທ່ານ ອາວ ຜິງຊິງ, ຫົວໜ້າສູນຄົ້ນຄວ້າອຸດສາຫະກຳໝາກຖົ່ວລຽນຂອງມະຫາວິທະຍາໄລກະສິກຳຢຸນນານ, ໄດ້ແນະນຳວ່າ: ຈີນໄດ້ນຳເຂົ້າໝາກຖົ່ວລຽນຕັ້ງແຕ່ປີ 1958, ຈົນຮອດປີ 2019 ຈຶ່ງໄດ້ບັນລຸຜົນສຳເລັດໃນການທົດລອງປູກໃນຂະໜາດໃຫຍ່ຢູ່ແຂວງໄຫຫຼຳ. ໃນເດືອນເມສາ 2026, ຢູ່ເມືອງຈິນຜິງ, ກິ່ງແຂວງຫົງເຫີ, ຢຸນນານ, ຕົ້ນໝາກຖົ່ວລຽນໝອນທອງທີ່ໄດ້ຮັບການປູກຝັງມາເປັນເວລາ 8 ປີ ໄດ້ອອກໝາກແກ່ຕາມທຳມະຊາດເປັນຄັ້ງທຳອິດ (ນ້ຳໜັກ 3,7 ກິໂລ). ນອກຈາກນີ້, ຢູ່ເມືອງເມີງລາ, ກິ່ງແຂວງສິບສອງປັນນາ, ຕົ້ນໝາກຖົ່ວລຽນທີ່ມີຄວາມສູງ 12 ແມັດ ໄດ້ອອກໝາກແກ່ເຕັມທີ່ 16 ໜ່ວຍ. ສະຖາບັນວິທະຍາສາດພືດເຂດຮ້ອນຢຸນນານ ໄດ້ນຳເຂົ້າຫຼາຍກວ່າ 70 ຊະນິດ ແລະ ດຳເນີນການຄົ້ນຄວ້າການຄັດເລືອກສາຍພັນທີ່ທົນທານຕໍ່ຄວາມໜາວ. ເຖິງແມ່ນວ່າຕົ້ນທຶນຂອງໝາກຖົ່ວລຽນພາຍໃນປະເທດຈີນຍັງຄົງສູງກວ່າໝາກຖົ່ວລຽນທີ່ນຳເຂົ້າໃນປັດຈຸບັນ, ແຕ່ດ້ວຍຄວາມກ້າວໜ້າທາງດ້ານເຕັກໂນໂລຊີ, ໃນອະນາຄົດຄາດວ່າຈະສາມາດປູກໝາກຖົ່ວລຽນພາຍໃນປະເທດຈີນທີ່ມີຄຸນນະພາບດີໄດ້.

ຈາກການເລັ່ງລັດການຂົນສົ່ງສິນຄ້ານໍາເຂົ້າ, ການບັງຄັບໃຫ້ຕະຫຼາດຜູ້ບໍລິໂພກ, ຈົນເຖິງຄວາມກ້າວໜ້າທາງດ້ານວິທະຍາສາດ ແລະ ການຄົ້ນຄວ້າໃນການປູກຝັງພາຍໃນປະເທດ, ຈີນກໍາລັງປ່ຽນແປງລະບົບຕ່ອງໂສ້ການຜະລິດທັງໝົດ ເພື່ອເຮັດໃຫ້ "ກະສັດແຫ່ງໝາກໄມ້" ຊະນິດນີ້ເຂົ້າເຖິງຄອບຄົວເຮືອນຊານຂອງປະຊາຊົນທົ່ວໄປຢ່າງແທ້ຈິງ.